Ysgol Betws Gwerful Goch

Mae’r ysgol wrth galon ei chymuned. Mae arweinwyr a staff yn creu a chynnal partneriaethau gwerthfawr sy’n cyfoethogi lles a phrofiadau dysgu disgyblion yn grefftus. Gwnânt ddefnydd cynhwysfawr o gyfraniadau ymwelwyr ac ymweliadau o fewn eu milltir sgwâr i ehangu profiadau’r disgyblion. Er enghraifft, mae cogydd lleol yn cydweithio â’r disgyblion i gynllunio bwydlen iach ar gyfer gweini bwyd i’r gymuned yng ‘Nghaffi Bach Betws’. Mae disgyblion hefyd yn cyfrannu’n gyson at fywyd y gymuned trwy berfformio mewn digwyddiadau lleol a dathliadau arbennig, fel boreau coffi Dydd Gŵyl Dewi yn yr ysgol. Yn ogystal, mae disgyblion yn ymweld â chartref preswyl lleol yn rheolaidd i ddarllen, perfformio a chwarae gemau gyda’r preswylwyr hŷn. Mae’r profiadau hyn yn datblygu medrau cymdeithasol disgyblion yn fwriadus, yn meithrin empathi a pharch tuag at eraill yn effeithiol ac yn cryfhau’r ymdeimlad o berthyn a balchder i’w bro yn hynod lwyddiannus. Mae’r gymdeithas rhieni ac athrawon yn hynod weithgar ac yn cyfrannu’n gyson at gyfoethogi’r ddarpariaeth a’r cyfleoedd a gynigir i ddisgyblion.